Playtime амьд хөгжмийн наадам 2016: Street style. Хоёрдугаар хэсэг

Амьд хөгжим, халуун дулаан орчин, найрсаг бас загварлаг залуусаар гурван өдрийн турш дүүрэн байсан 2016 оны Playtime наадам амжилттай зохион байгуулагдаж өндөрлөлөө. Хоёр дах өдөр тайзан дээр гарсан хамтлагуудаас The Rec on хүчтэй байж, The Colors хамтлаг удахгүй гарах гэж буй шинэ цомгийнхоо дуунуудаас толилуулсан. Мөн хоёр дах өдрийн хаалтын тоглолтыг хийсэн The Radio Dept. хамтлаг ирэх аравдугаар сард гаргах цоо шинэхэн цомгийнхоо гурван дууг тоглосон байгаа. Дашрамд дурдахад тэд сүүлийн гурван жил тайзан дээр амьдаар тоглоогүй байсан бөгөөд монголын үзэгчид тэдний шинэ цомгийн дуунуудыг хамгийн анх амьдаар нь сонссон азтай сонсогчид болж чадлаа.

Playtime наадмын эргэн тойронд болсон бүх зүйлсийг "хөгжил" гэх үг тодотгох болов уу. Хамтлаг дуучид аль болох шинэ дуу хөгжмөө, хамгийн сайнаар тоглон үзүүлж, ирсэн зочид биеэ соёлтой авч явахаас эхлээд фестиваль бүхэлдээ эерэг хандлагаар дүүрэн байлаа. Тус наадмын ко-продюсер Ц.Ариунаа хэлэхдээ "Инди хөгжим сонсдог, өөрийн гэсэн сонирхлын ертөнцтэй, урлаг амьдрал хоёрыг хослуулан амьдардаг эдгээр залуучууд монголын ирээдүйг авч явна" гэж ярьж байв. Харин залуусынхаа өмнөөс Playtime наадмыг амжилттай зохион байгуулж, хөгжимд хайртай, хөгжмийг ухаж ойлгодог хүмүүсийг гурван өдрийн турш цэнгэлдэх боломж олгосон Hi-Fi media group-ын бүх хамт олонд талархал илэрхийлье.