Өвдөг хүрсэн урттай шоорт – намрын хит загвар. Ямрыг нь сонгох вэ?

Энэ улирлын тренд эсгүүр бол өвдөг хүрсэн урттай шоорт юм. Илүү урт кюлот өмд биш эсвэл илүү богино бермуд шоорт биш. Харин яг л өвдөг хүрсэн урттай шоорт нь төрөл бүрийн материал ба өнгөний сонголттойгоор намрын цуглуулгуудад давамгайлж байна. Тэр дундаа Bottega Veneta брэндийн арьсан шоорт болон Celine брэндийн галууны хөлөн хээтэй костюмын материалтай шоорт нь энэ улирлын хамгийн хүсэмжит загваруудаар нэрлэгдсэн байгаа. Ийм шоортыг хэрхэн загварчилж өмсөх вэ гэж үү? Энгийн цагаан футболка, майка дээр өмссөн хүрэм, хоолойтой цамц эсвэл сорочкатай хослуулж болно. Харин гутлын хувьд кет, нарийн оосортой сандаал эсвэл өвдөг давсан түрийтэй гуталтай хослуулахыг зөвлөж байна. Нэгэн хэвийн өмд, юбка өмсөхийн оронд хувцасны шүүгээгээ төрөлжүүлэн энэхүү сонирхолтой эсгүүрийг заавал туршаад үзээрэй.