X-Files киноны шинэ цувралын танилцуулга гарлаа

FOX суваг “X-files” киноны шинэ цувралын анхны сурталчилгааг гаргалаа. Энэхүү 17 секундын бичлэг дээр цувралын эзэн жүжигчид болох Дэвид Духовны болон Жиллиан Андерсон нарын танил төрх үзэгдэнэ

"Нууц хавцаст хэргүүд" кино 1993-2002 он хүртэл есөн жилийн турш FOX сувгаар гарсан билээ. Зарим нэгэн телевизийн олон ангит цувралууд үзэгчдийн сэтгэлд гүн үлдсэн байдгаас тэр кино хэдийнэ дууссан байвч уран бүтээлчид нь үе үе дахин цугларч үргэлжлэл гаргах хэрэгтэй болдог ажээ. Ийм учраас Дэвид Линч гэхэд 26 жилийн дараа "Твин пикс"-ийн шинэ цувралыг зэхэж байхад харин Крис Картер "Нууц хавцаст хэргүүд"-ийнхээ зургаан шинэ ангийг 2016 нэгдүгээр сараас толилуулахаар болжээ. 

Энэхүү анхны танилцуулгыг үзэхэд Малдер, Скалли нарын ажилладаг ер бусын хэрэг илрүүлэх хэлтэст дахин нэг шинэ ээдрээ тайлах даалгавар гарчээ. 
FOX  өмнө нь "Нууц хавцаст хэргүүд"-ийн шинэ цувралын зураг авалтын хэсгээс "201 өдөр" нэртэй төслийн хүрээнд үзэгчдэд дэлгэж байсан юм. "201 өдөр" гэдэг нь шинэ цувралыг нээх өдөр хүртэл үлдсэн хоногийн тоог заахаас гадна тус цувралаас олон нийтийн хүртээл болсон бүх ангиудын тоо байжээ.