Монголын загварын ертөнцөд өрнөж буй шинэ үйл явдал бүрийг уншигчиддаа цаг алдалгүй хүргэхийг зорьдог BURO.-гийн анхаарлыг энэ удаад KAPRIZA (@kapriza_handicraft) хэмээх аксесуарын брэнд татлаа. Муу бүхнээс хамгаалагч нүдийг дүрсэлсэн ээмэг, аз авчрагч соно мэт харагдах энгэрийн тэмдэг, гоёмсог хатгамалтай атлас цүнх гээд хараа булаам гоёл чимэглэлүүдийг гараар урладаг КAPRIZA брэндийг интьерер дизайнер мэргэжилтэй Г.Дөлгөөн 2017 онд үүсгэн байгуулжээ.

Дизайнер Г.Дөлгөөн аксесуаруудынхаа дизайныг гаргахаас эхлээд эцсийн бүтээгдэхүүн болох бүхий л зүйлийг өөрийн гараар хийдэг тул түүний загварууд ахин давтагдашгүй, онцгой болдог байна. Түүнчлэн KAPRIZA-гийн эдлэлүүдийг олон янзаар загварчлан зүүх боломжтой байдаг нь бидэнд хамгийн ихээр таалагдлаа. Тухайлбал гялалзсан хатгамал бүхий богц хэлбэртэй гар цүнхийг шинэ жилийн үдэшлэгээс гадна хөгжмийн наадамд, мөн аялалд ч хүртэл загварчлан зүүх боломжтой бол энгэрийн тэмдгийг кет, цүнх зэргээ чимэглэх байдлаар ашиглах боломжтой билээ.

"Орчин үед хүмүүсийн хэрэглээ улам минимал хэв маягтай болж байгаа ч баяр ёслол, үдэшлэг, онцгой баярт мөчүүдэд бид бусдаас ялгарах өөрийн гэсэн дүр төрх, стилийг бүрдүүлэхийг хүсдэг шүү дээ. KAPRIZA-ийн аксесуарууд гял цал байдаг нь ч үүнтэй холбоотой ба зүүж байгаа хүнийхээ гоо үзэсгэлэнг улам тодотгож, дахин давтагдашгүй дүр төрхийг бий болгоход чиглэсэн байдаг. Тиймээс загвар бүрээс цөөн тоогоор гаргаж, ямар нэгэн хэв маягт баригдахгүйгээр улирал бүр шинэ загварууд гаргаж байхыг зорьдог" хэмээн Дөлгөөн брэндийнхээ тухай ярьсан юм.

Тэгвэл бид KAPRIZA чимэглэлүүдтэй танилцан шинэ жилийн үдэшлэгт хэрхэн загварчилж болох тухай зөвлөгөөг бэлтгэлээ.