H&M брэнд нь загварлаг өдөр тутмын хувцас, гоёл чимэглэлийг боломжийн үнээр худалдаалдаг төдийгүй Balmain, Kenzo, Erdem, Versace зэрэг тансаг зэрэглэлийн брэндүүдтэй хамтарсан коллекци гаргадгаараа олонд танигдсан билээ. Харин энэ жил уг брэнд нь загвар зохион бүтээгч Сюзи Кейвийн үүсгэн байгуулсан “The Vampire’s Wife” брэндтэй хамтран Хэллоуины баярт зориулсан коллекци танилцуулж байна.
“The Vampire’s Wife” брэнд нь 2014 онд нээгдсэнээсээ хойш Холливүүдийн жүжигчин Кира Найтли, загвар өмсөгч Кейт Мосс, Английн жүжигчин Жоди Комер зэрэг олон алдартнуудыг байнгын үйлчлүүлэгчээ болгож чадсан бөгөөд “Falconetti” нэртэй цацагтай даашинзаараа улаан хивсний ёслолуудыг гоёж байсан юм. Загвар зохион бүтээгч маань Хатан хаан Викториагийн үе болон хуучны винтэж загваруудаас санаа авч дизайнаа зохиох дуртай ба H&M-ийг хамтрах санал тавихад нь дуртайяа зөвшөөрсөн гэнэ.
Хээнцэр готик стилийн уг коллекци нь жижиг хар даашинзыг онцолж түүн дээрээ өргөн ханцуй, хүзүүндээ зангиддаг бантик, металл өнгө болон торон оруулга зэрэг романтик хэв маягийн деталиудыг оруулж өгчээ. Үүнээс гадна эрвээхий хэлбэртэй нарны шил, салдаг зах, торон оруулгатай цүнх зэрэг гоёмсог гоёл чимэглэлүүд мөн цуглуулгад багтжээ. Хамгийн гол нь энэ бүгдийг байгальд ээлтэй дахин боловсруулсан материалаар хийсэн нь магтууштай юм.
Нэмж хэлэхэд, Сюзигийн нөхөр болох алдарт хөгжимчин Ник Кейв гоёл чимэглэлийн загваруудыг нь гаргасан байна. Тэрээр өнгөлөг ээмэгнүүд, хүзүүний гинж, бөгж болон зүрх, ном, үсэг, нүд, цох зэрэг төрөл бүрийн дүрс бүхий чармуудтай бугуйвч гэх мэт олон сонирхолтой загваруудыг урлажээ.
Уг коллекци нь аравдугаар сарын 22-ноос эхлэн онлайнаар болон H&M брэндийн салбар дэлгүүрүүдээр худалдаалагдах болно.
Бусад Нийтлэлүүд
Buro 24/7-гийн сонголт
Редакторын Сонголт
Buro 24/7-гийн сонголт