Гоёл Кашмер компанийн бүтээн байгуулалтын нээлтийн ёслол болж өнгөрлөө

2023 оны 6 сарын 5-ны өдөр ноолуурын салбарын томоохон үндэсний үйлдвэрлэгчдийн нэг Гоёл Кашмер компани АНУ-ын Хөгжлийн Санхүүгийн корпорацтай хамтран хэрэгжүүлсэн төслийн нээлтийн арга хэмжээ ёслол төгөлдөр болж өнгөрлөө. Төслийн хүрээнд Гоёл Кашмер компани ажилчдын тав тух, чөлөөт цагаа зөв боловсон өнгөрөөх орон зай, нийгмийн асуудлыг шийдсэн тохилог үйлдвэрийн байр, ажилчдадаа зориулсан хүүхдийн цэцэрлэг бүхий 85 айлын орон сууцыг ашиглалтад оруулж салбартаа шинэ жишиг тогтоожээ.

Гоёл Кашмер компани тус арга хэмжээний үеэр нийт дөрвөн төрлийн цуглуулга танилцуулсан юм. Үүнд:

"MELLOW" цуглуулга, хавар-зун 2023

Тус цуглуулгыг урлахдаа жаргах нарны туяанд солонгорон харагдах нуурын эргийн уусалттай зөөлөн өнгөнүүдээс санаа авчээ. Ингэхдээ нарны дулаан элч, намуухан салхийг мэдрүүлэх нарийн гейчийн сүлжээсээр цуглуулгаа улам баяжуулсан байна.

"Mysterious Art" цуглуулга, намар-өвөл 2023

Гоёлын капсул цуглуулга

Хуримын цуглуулга

Монголд анх удаа тансаг ноолуурыг гар хийцээр нарийн чимэглэн урласан хуримын даашинзны цуглуулга.

Үндэсний үйлдвэрлэгч Гоёл Кашмер компани 2005 онд ноос, ноолууран сүлжмэл оёмол, нэхмэл бүтээгдэхүүн үйлдвэрлэл, худалдаа чиглэлээр үүсгэн байгуулагдсан бөгөөд өнөөдрийн байдлаар жилдээ 8,000 гаруй загварын, 350,000 ширхэг сүлжмэл, нэхмэл, оёмол, ширмэл бүтээгдэхүүнийг үйлдвэрлэх хүчин чадалтай, цогц үйлдвэрлэл юм.

АНУ-Монгол улсуудын найрсаг хамтын ажиллагааны томоохон илрэл болсон уг төслийн нээлтийн арга хэмжээнд АНУ-аас Монгол улсад суугаа бүрэн эрхт элчин сайд Ричард Буанган, Япон улсын элчин сайд Кобаяши Хироюки, Солонгос улсын элчин сайд Ким Жон Гү нар хүрэлцэн ирж, компанийн үйл ажиллагаатай танилцсан байна.

Түүнчлэн Mонгол улсын ерөнхий сайдын эдийн засаг, гадаадын хөрөнгө оруулалт хариуцсан зөвлөх ноён Д.Ирмүүн, ХХААХҮЯ-ны сайдын зөвлөх ноён Б.Батбаатар болон Монголын Ноос Ноолуурын Холбоо, Тогтвортой ноос ноолуурын эвсэл, Тогтвортой ноос ноолуурын платформ болон ноос ноолуурын салбарын компаниудын төлөөлөл хүрэлцэн ирж, хүндэтгэл үзүүлжээ.