Таны gym-ний өмсгөл: Виктория Бекхэм Reebok брэндэд зориулан цуглуулга бүтээлээ

Өдөрт хоёр цаг, долоо хоногийн өдөр бүр спортоор хичээллэдэг дизайнер Виктория Бекхэм хэдийгээр дэгжин бүсгүйн гоёмсог загваруудыг урладаг ч бэлтгэлийн хувцасны талаар багагүй мэдлэгтэй нэгэн. "Би үнэхээр өөрөө чин сэтгэлээсээ хийхийг хүссэн зүйлээ л хийдэг" хэмээн Виктория Reebok брэндэд зориулан урласан цуглуулгын тухайд хэлсэн юм. "Би аль эртнээс л өөрийн цуглуулгадаа пүүзний загвар нэмэхийг хүссээр ирсэн. Гэхдээ спорт гутал гэдэг тусгай стандартын дагуу хийгддэг зүйл учир би энэ чиглэлээр мэргэшсэн, нарийн мэдлэг туршлагатай брэндтэй хамтрахыг зорьсон юм."

Виктория Бекхэм энэхүү цуглуулгадаа спорт цээживч, оёдолгүй леггинс, ханцуйгүй юүдэнтэй цамц, сагсчдын өмсгөлөөс сэдэвлэсэн өргөн өмд, футболка, куртка, пүүз ба үүргэвчтэй цүнх гээд байж болох бүх төрлийн загваруудыг багтаасан бөгөөд улбар шар, цайвар шаргал, хар зэрэг өөрийн стилийн таних тэмдэг болсон үндсэн өнгөнүүдийг ашигласан байгаа. Мөн цуглуулгын зарим загварууд Victoria Beckham брэндийн хувцаснуудаас огт ялгагдахааргүй маш дэгжин хийцтэй тул зөвхөн спортоор хичээллэхдээ гэлтгүй бүхэл өдрийн турш ямар ч нөхцөлд өмсөж болох давуу талтай болжээ.

Цуглуулгыг Reebok брэндийн вебсайт дээрээс худалдан авах боломжтой.