Та өглөө сэрээд хамгийн түрүүнд юу хийдэг вэ? Ихэнх хүмүүс шууд утсаа асаагаад шинээр ирсэн мессеж, мэдэгдлээ шалгаж эхэлдэг. Харин мэргэжилтнүүдийн зөвлөж буйгаар энэ зуршлыг 5-10 минутын сунгалтын дасгалаар сольсноор таны өдөр илүү үр бүтээлтэй, урам зоригтой өнгөрч болох гэнэ.

Сэрсэн даруйдаа сунгалтын дасгал хийх нь яагаад чухал вэ?

Freeletics аппликейшний дасгалжуулагч, хоол тэжээлийн мэргэжилтэн Дэвид Вайнер-ын хэлснээр “Хүн өдөр бүр сунгалтын дасгал хийж байх хэрэгтэй. Хөдөлгөөнтэй ч бай, хөдөлгөөнгүй ч бай сунгалт таны бие махбод, сэтгэл санаанд зайлшгүй хэрэгтэй” хэмээжээ.

Сунгалт нь:

• Цусны эргэлтийг сайжруулна.
• Шөрмөс, булчингийн чангарлаас үүдэлтэй өвдөлтийг багасгана.
• Эндорфин, серотонин зэрэг "аз жаргалын даавар"-уудыг ялгаруулснаар сэтгэл санааг өөдрөг болгоно.
• Өдрийг илүү тавтай, тайван, эрч хүчтэй өнгөрүүлэхэд тусална.

Биеийг сэрээж, тархийг “асаах” горимд шилжүүлнэ

Нөхөн сэргээлтийн дасгалжуулагч Митч Рейнсфорд өглөөний сунгалт нь бие махбод, сэтгэлзүйг идэвхжүүлэх чухал дохио болдог хэмээн онцолсон. Унтаж байх үед булчингууд чангарч, зүрхний цохилт удааширсан байдаг тул өглөө сунгалт хийснээр таны мэдрэлийн систем болон булчин “сэрдэг” аж.

Мөн оффисын ажлаас үүдэлтэй “desk gremlin” буюу нуруу бөгтийж, цээж хавчигдсан байдал өнөө үед залуучуудын дунд маш түгээмэл асуудал болоод байна. Харин үүнийг засахад сунгалтын дасгал онцгой нөлөөтэй гэдгийг дасгалжуулагчид санал нэгтэй зөвлөдөг билээ. 

Өглөөг эрч хүчтэй эхлүүлэхэд тань туслах хялбар сунгалтын дасгалууд

Өглөө бүр ердөө 5-10 минутыг өөртөө зарцуулаад дараах сунгалтын дасгалуудыг хийгээд үзээрэй. Бүх дасгалыг 20 секунд барьж, нэг удаа давтахад хангалттай. Дасгал хийсний дараа ус уухаа мартуузай.