Apple компанийн цоо шинэ iPhone 17 цувралаа танилцуулах томоохон арга хэмжээ 2025 оны есдүгээр сарын 9-нд Калифорни мужийн Купертино хот дахь Apple Park-ийн Стив Жобсын театрт болох бөгөөд дэлхий даяарх технологи сонирхогчдын болон үнэнч хэрэглэгч нарын анхаарлын төвд ороод байна.

Энэ удаагийн арга хэмжээний үеэр тэд iPhone 17, iPhone 17 Air, iPhone 17 Pro болон iPhone 17 Pro Max загваруудаа танилцуулах юм. Эдгээрээс хамгийн их хүлээлт үүсгээд буй загвар нь iPhone 17 Air. Тус загвар нь өмнөх “Plus” хувилбарын оронд гарч ирэх бөгөөд 6 мм-ээс нимгэн хийцтэйгээрээ онцлог. Энэ нь iPhone-ийн түүхэн дэх хамгийн нимгэн загвар болох төлөвтэй байгаа гэнэ.

Гэхдээ нимгэн хийцийнхээ улмаас iPhone 17 Air зөвхөн нэг арын камертай, мөн жижиг багтаамжтай батарейтайгаар гарах нь тодорхой болжээ. Нимгэн, загварлаг дизайн нь хэрэглэгчдийн сонирхлыг татах хэдий ч өдөр тутмын ашиглалт болон батарейн ажиллагааны хувьд хэр үр дүнтэй байх нь одоогоор эргэлзээтэй байгаа юм.