The Book of Noodle: Gorillaz хамтлаг шинэ цомгийнхоо тизерийг гаргажээ

Gorillaz хамтлаг зургаан жилийн турш чимээгүй байсны эцэст шинэ цомгийнхоо тизерийг Intsagram хуудсаараа дамжуулан цацсан байна

Gorillaz хамтлаг Instagram хуудаснаа The Book of Noodle нэртэй тизер ба 15 секунд үргэлжлэх цуврал бичлэгүүдийг цацсан байна. Уг бичлэгүүдэд хамтлагийн гишүүн Noodle-д тохиолдсон явдлуудаас харуулдаг. Бас тизерт тус хамтлагийн зургаан жилийн өмнө гаргасан "Plastic Beach" цомгийн тухай мөн дурдсан байна. Одоогийн байдлаар энэхүү тизер нь яг ямар учиртай болох нь тодорхойгүй байгаа ч Gorillaz хамтлаг энэ жил шинэ цомгоо гаргах юм. Тиймээс бид тун удахгүй Gorillaz-ын цоо шинэ бүтээлийг хүлээн авч магадгүй.

Анх 1998 онд Дэймон Албарн ба Жейми Хьюлетт нар Gorillaz нэртэй виртуал хамтлагтаа зориулж Noodle хэмээх дүрийг бүтээсэн юм. Тэрээр гитар тоглодог бөгөөд Gorillaz хамтлагийг байгуулагдах үед 10 настай байсан. Хамтлагийн бусад гишүүд шинэ гитарчин хайж байна гэсэн зарлал тавьснаар Noodle хамтлагт ирсэн гэх намтартай. Noodle Япон улсаас Их Британид FedEx-ийн хайрцганд сууж ирсэн ба түүний англи хэлээр мэддэг цорын ганц үг нь "Noodle" буюу "Гоймон" байжээ.