Намар-өвөл 2023 эрэгтэй загварын долоо хоног амжилттай зохион байгуулагдаж өндөрлөөд байна. Дизайнерууд урьдын адил эрчүүдийн хувцасны шүүгээнд шинэлэг силуэт нэмэх эрэлдээ гарсан нь ташуу энгэртэй топ, бартаа захгүй пиджак, шинэ хэлбэрийн зах зэргээр тодорхойлогдлоо. Түүнчлэн "low-key luxury" буюу энгийн хэр нь тансаг хэв маяг эрчүүдийн загварт зонхилж эхэллээ.
Нэг ч нугалаасгүй болтол нь индүүдээд болгоомжтойгоор өлгөөд тавьчихсан мэт цэмцгэр байдал бол намар-өвөл 2023 улиралд тренд болж буй пальтоны гол шинж юм. Энэ удаа Dries Van Noten, Saint Laurent, Loewe, Dior загварын орднууд "quiet luxury" буюу даруу тансаглал мэдрүүллээ.
Загвар зохион бүтээгчид пиджакийг бартаа захгүй силуэттэйгээр урлажээ. Энэхүү загвар нь илүү хялбар, өдөр тутмын, хөнгөн өнгө аясын илэрхийлэл болж байна.
Японы Kolor брэнд тэгш бус хэмтэй хүрмийн захаар цуглуулгынхаа хэв маягийг тодорхойлж, Dior загварын ордон бүтээлч захирал Сен Лораны ажиллаж байх үед анхны удаагаа эсгэж байсан дугуйрсан захыг сэргээн урлаж, харин Prada тод өнгийн салангид зах харуулж, бараан өнгийн пиджактай хослуулан өнгөний контраст үүсгэжээ.
Эрчүүдийн загварын ертөнцөд шинэ уур амьсгал оруулсан дараагийн хувцас бол ташуу энгэртэй топ юм. Дан мөртэй энэхүү цамцыг пиджакийн дотуур, эсвэл сорочкан цамцны гадуур загварчилж өмсөхийг брэндүүд харуулжээ.
Эрэгтэй болон эмэгтэй загварыг тусгаарладаг зааг улам л бүдгэрсээр байна. Эрчүүд юбка, даашинз, корсет гэхчлэн ямар ч хувцас өмсөж болохыг салбарынхан бидэнд ойлгуулахыг хичээсээр. Тэгвэл оролдлого үргэлжлэн энэ удаа эрэгтэй хүмүүс ч гэсэн ноосон дотуур өмдөө гадаа өмсөж болохыг харууллаа. Дотуураа өмсөж хэвшсэн өмдөө хэрхэн шинээр загварчилж болохыг Gucci, Loewe, Auralee брэндээс суралцах боломжтой.
Dries Van Noten өндөр суудалтай брюкэн өмдөө нэг ч биш, хоёр ч биш, бүр гурван давхар тэлээлэхээр шийджээ. Түүнчлэн JW Anderson, Yohji Yamamoto нар энэхүү чиг хандлагын эгнээнд багтаж олон давхар тэлээ бэхэлсэн хүрэм, пиджакыг толилуулсан юм.
Энэ намар болон өвлийн улиралд тун хялбар бөгөөд загварлаг харагдуулдаг бүсэлхийнээсээ цамцаа уях стилистик аргачлалыг хэрэгжүүлэхийг зөвлөж байна. Та дан ганц цамц ч гэлтгүй куртка, пиджак гээд ямар ч төрлийн хувцас ашиглах боломжтой.
Эрэгтэй загварын долоо хоног зохион байгуулагдахад Giorgio Armani, Dior брэндийн цуглуулгыг маш олон хүн тэсэн ядан хүлээдэг, нүд, чих тавин үздэг билээ. Энэ улирлын хувьд тэдний цуглуулгад саарал өнгө давамгайлсан нь гол чиг хандлагаар нэрлэгдээд байна.
Бусад Нийтлэлүүд
Buro 24/7-гийн сонголт
Загвар / Үнэт эдлэл & Аксесуар
Редакторын Сонголт
Buro 24/7-гийн сонголт
Загвар / Үнэт эдлэл & Аксесуар