Улаан, хар, цагаан, бейж, алтан шар гэх таван өнгийг Chanel өөрсдийн үндсэн өнгөнүүд хэмээн зарласан байдаг. Эл өнгөнүүд хоорондоо маш сайн нийцдэг гэдгийг тус брэнд загваруудаараа батлан харуулдаг. Энэ жилийн Resort шоунд эдгээр өнгөнүүд давамгай байдлаар зонхилж, нарлаг өдрүүдийг эрхшээх бүсгүйчүүдийн хувцас сонголтод Chanel ийн нөлөөллөө. Ажиглавал бүтээлч захирал Матье Блази уг загварын ордонд хэд хэдэн шинэ өнгө аяс оруулаад буй. Ажил хэрэгч хувцаслалтад багтдаг сорочкийг даашинзтай хослуулж, нэхмэл даавуугаар юбка урлахдаа илүү өндөр оноотойгоор загварчилж байгаа нь нэг талаараа брэнд илүү залуу бүсгүйчүүдэд чиглэж байна уу гэлтэй. Камелия цэцэг тус брэндийн бэлгэдэл цэцэг гэж тунхаглагдаж байсан ч Матье харин Chanel-д янз бүрийн цэцэгсийг онцлоод байгааг дурдахгүй орхиж болохгүй. "Коко амьд байсан бол уурлах вий дээ" хэмээсэн хошигнол ч цахим орчинд нийтлэгдэж байлаа. Гэвч гэрийн даалгавраа үргэлж онц дүнгээр хамгаалдаг сурагч шиг Матье, Кокогийн байгуулсан вант улсыг улам өндөрт өргөсөөр байгааг мэргэжилтнүүд магтаад буй.

Эрт үед загварын орднууд бүтээл болгондоо нэр өгдөг байсан шиг өдгөө Gucci өөрсдийн загвар бүрээрээ тодорхой нэг дүрийг онцолжээ. Брэндийн бүтээлч захирал Демна: “Би энэ цуглуулгаараа дамжуулан гудамжаар алхахдаа таарч болох, хувцсыг өөрийн хэв маягтаа тохируулан янз бүрээр өмссөн хүмүүсийг харуулахыг хүссэн” хэмээжээ. Нээрээ ч загвар болгон нь өөр хоорондоо авцалдахгүйгээр модель болгон өөр өөрсдийн хувцаслалтаараа тодорхой нэг дүрд орсон мэт байлаа. Том Фордын Gucci-д зориулан хийж байсан биед яг таарсан эмэгтэй хослол, G үсэгтэй бүс, савхин хүрэм, Gucci-гийн нэрийн хээтэй арьсан цүнх гээд тус брэндийн үе үеийн хуучиршгүй загварууд дахин эргэн иржээ. Нью-Йорк хотод зохион байгуулагдсан тус шоунд Парис Хилтон загвар өмссөн явдал нь Gucci ямагт хэн бүгдийн ярих халуун сэдэв байсаар байх болно гэдгээ улам зарлах шиг боллоо. Түүнчлэн Синди Кроуфорд хар өнгийн даашинзаар шоуг хаасан нь тус үдшийн хамгийн сэтгэл хөдөлгөм мөч болжээ.

Жонатан Андерсон өөрийн хэв маягийг Dior-той хэрхэн уялдуулахаа сайн мэддэг бөгөөд ингэхдээ тэрээр тус брэндэд өмнө ажиллаж байсан домогт дизайнеруудын бүтээлүүдээс эш татаж сүлэлдүүлдэг. Жонатан энэ удаагийн бүтээлдээ даашинзнуудыг илүүтэй танилцуулсан нь тун сонирхолтой байлаа. Бэлхүүс үл тодотгох шулуун загвартай даашинз, нарийн ширхэгтэй торгон юбкыг нэг талаар нь хуйлж хөвдөн цэцэг лугаа чимэглэл хатгах нь сүүлдээ Christian Dior анхнаасаа л ийм байсан билүү гэх эндүүрэлд автуулах шиг. Юутай ч домог болсон “Bar” хүрэм дахин загварчлагдлаа. Твид материалаар хүрэм урлахдаа хормой хэсгийг сэмэрсэн мэт цацагласан нь хамгийн онцлог загваруудын нэг болжээ. Нөгөөтээгүүр эмэгтэй хүний биеийн харьцааг төгс харагдуулахын тулд бүтээлч эрхэм Жонатан, эсгүүрээр бус даавууг биеийн аль нэг хэсэгт хумьж эсвэл зангидсан мэт силуэт үүсгэдэг нь түүний өмнөх загваруудаас ажиглагдаж байсан бол Resort загварууд дээрээ ч дахин давтлаа.

Louis Vuitton өөрсдийн Resort цуглуулгаа танилцуулахдаа их хотын хувцаслах соёл болон хөдөө нутгийн залуусын хэв маягийг (uptown/downtown) хольж, граффити урлагийн түүчээ болсон зураач Кэйт Харингийн үзэл санаа, бүтээлүүдээс үндсэн санаануудаа авчээ. Бүтээлч дизайнер Николя Жескьер тус уран бүтээлчийг гүнээ хүндэтгэн биширч явдгаа дурдан, түүний уран бүтээлийг хольсноор хамгийн сонирхолтой загварууд бий болсон гэдгээ ч онцолсон юм. Цуглуулгын хувцас материалын сонголт баялаг төдийгүй янз бүрийн тод өнгийг хооронд нь зоригтойгоор хольж, савхин хүрмийг дөрвөлжин мөртэйгөөр эсвэл үл ялиг cowboy хэв маягтайгаар загварчилж, хонхон хэлбэртэй нарны малгайг цулгуй өнгөтэй ажил хэрэгч хослолтой нийцүүлсэн нь их хотын хэв маяг эсвэл амралт зугаалгын хувцаслалт гэдэг нь эргэлзэм хэр нь сонирхолтой байлаа.