Есүс Христийн мэндэлсэн өдрийг зарим улс орнууд маш өргөн хүрээнд тэмдэглэн өнгөрүүлдэг билээ. Зул сарын баярын бас нэгэн чухал зүйл бол мэдээж хэрэг баярын ширээ гэдэгтэй хэн ч маргахгүй биз ээ. Жишээ нь хүмүүс төгс бүрж шарсан гахайн мах, үхрийн хавирга, амтат бялуу ба пудинг зэрэг уламжлалт зоогуудыг бэлтгэж, гэр бүл, найз нөхдийнхөө хүрээнд аз жаргал, баяр баяслаар дүүрэн угтдаг байна. Харин одоо зул сарын баяраар орон орны хүмүүс ямар зоог бэлтгэж иддэг талаар хамтдаа харцгаая.
Австралид: "Павлова" бялуу
ОХУ-ын алдарт балетчин Анна Павловагийн нэрэмжит энэхүү амттанг өндөгний цагаан, нунтаг сахар, жимс жимсгэнээр хийдэг тул маш хөнгөн бүтэцтэй болдог. Яг л үүлэн дээр хөвж байгаа мэт мэдрэмж төрүүлдэг энэхүү амттан нь хүүхэд, настай хүмүүс гээд хүн бүхэнд таалагддаг.
Германд: Шарсан галуу улаан байцааны хамт
Германчууд зул сарын баяраар шүүслэг шарсан галууг улаан байцааны хачиртай хамт иддэг. Тэд галуунд ихэвчлэн алим, сонгино, туулайн бөөр эсвэл чавгаар шанз хийдэг байгаа.
Филиппинд: Бибингка будааны бялуу
Бибингка гэх нэртэй будааны бялуу нь зул сарын баяраар Филиппинд маш түгээмэл болдог амттан юм. Зөөлөн хэрнээ зажлууртай энэхүү амттанг зул сарын баярын үеэр ихэвчлэн Католик сүмийн гадаа худалдаалж байх нь элбэг харагддаг.
Японд: KFC
Юуны өмнө зул сарын баяр бол Японы үндэсний баяр биш гэдгийг дурдах хэрэгтэй. Гэхдээ хамгийн сонирхолтой нь 1974 оны арванхоёрдугаар сард KFC түргэн хоолны сүлжээ Японд "Kentucky for Christmas!" буюу "Зул сарын баяраар Кентакки!" гэх нэртэй аян өрнүүлснээр Япончууд жил бүрийн уг өдөр KFC иддэг уламжлал тогтсон юм. Тэгэхээр өнөөдөр буюу жил бүрийн зул сарын баяраар 3,6 сая Япон гэр бүл KFC-гийн шарсан тахиа зооглодог байна.
Их Британид: Инжиртэй пудинг
Инжир жимсээр хийдэг энэхүү амттан нь XVI зууны үеийн Англи улсаас гаралтай. Найрлагандаа амтат инжир, хатаасан жимс, шанц, задь, брэнди дарс агуулдаг уг пуддингийг нэг сарын турш хадгалж бэлтгэдэг байна.
Перуд: Халуун шоколад
Зул сарын баяраар Перуд "Chocolatadas" нэртэй арга хэмжээ зохион байгуулагддаг уламжлалтай. Энэ үеэр хүмүүс панеттоне гэх амтат талх идэн халуун шоколад ууж баяраа тэмдэглэдэг байна.
Францад: Туулайн бөөрөөр хийсэн шанзтай цацагт хяруулын мах
Зул сарын баярын өмнөх өдөр франц хүмүүс сүмд мөргөл үйлдсэнийхээ дараа "Réveillon" гэх уламжлалт хоолыг зооглодог. Энэхүү франц маягийн хоол нь туулайн бөөрөөр хийсэн шанзтай цацагт хяруулын мах, хясаа, фуа гра, хавч болон төрөл бүрийн бяслагнаас бүрддэг байна.
Энэтхэгт: Бириани
Энд зул сарын баярыг Барууны болон Энэтхэгийн уламжлалт соёлыг хослуулан тэмдэглэдэг. Жишээ нь баярын ширээнд зул сарын бялуу болон дарс, бириани гэх будаатай хуурга, кардамон, үзэм, гүргэм, бялзуухай самар, бүйлсний чихэрлэг амттай фирни нэртэй будааны пудингтэй хамт тавьдаг.
АНУ-д: "Eggnog"
АНУ болон Канадад зул сарын баярыг "Eggnog"-гүй төсөөлдөггүй. Энэхүү ундааг өндөг, сүү болон элсэн чихэртэй ром дарсаар хийдэг. "Eggnog" ундаа нь хамгийн анх Их Британид үүссэн боловч XVIII зуунд АНУ-д дэлгэрч, үүнээс хойш энд зул сарын баярын уламжлал болон үлдсэн юм.
Италид: Панеттоне
Анх Милан хотод үүссэн энэхүү Итали маягийн амтат талхыг зул сарын баяраар улс орон даяар иддэг уламжлалтай. Панеттоне амттаны тухай сонирхолтой баримт дэлгэхэд энэ жил Милан дахь II Виктор Эммануэлийн галерейд дэлхийн хамгийн том панеттонег танилцуулсан байгаа. Уг амтат талх нь хоёр метр өндөртэй бөгөөд 140 кг жинтэй байжээ.
Бусад Нийтлэлүүд
Buro 24/7-гийн сонголт
Редакторын Сонголт
Buro 24/7-гийн сонголт