Бейонсегийн Cowboy Carter аялан тоглолтын нүд хужирлам хувцаслалтууд

Америк төдийгүй дэлхийн хөгжмийн ертөнцийн хамгийн нөлөө бүхий дуучдын нэг болох Бейонсе Cowboy Carter нэртэй бүрэн хэмжээний бие даасан аялан тоглолтоороо шуугиулсаар байна. АНУ болон Европ даяар 32 удаа тоглогдох тус тоглолт нь түүний гурван хэсэг бүхий хөгжмийн төслийн хоёрдугаар бүлэг нь юм.

Тоглолтын үеэр дуучин шинэ цомгийнхоо дуунуудыг хүргээд зогсохгүй Crazy In Love, Formation зэрэг хуучны хитүүдээ ч тайзнаа толилуулжээ. Нэмж дурдахад Cowboy Carter нэртэй түүний цомог кантри, өмнөдийн хэв маягтай соул, R&B гэх мэт олон төрлийн урсгалаар тодорхойлогдож байгаа бөгөөд 67 дахь удаагийн Грэммигийн жилийн шилдэг цомог шагналыг хүртэж түүхэн амжилтыг бичсэн билээ.

Харин тоглолтын хамгийн сэтгэл хөдөлгөм хэсэг нь мэдээж түүний өмссөн тайзны гоёлын хувцас. Бейонсе урьдын адил өөрийн тоглолтод зориулан дэлхийн шилдэг дизайнеруудаар тусгайлан урлуулсан загваруудыг өмссөн бөгөөд аялан тоглолтын стилистүүдээр Шиона Турини, Ти Хантер, Карен Лангли нар ажиллажээ. Түүнчлэн өмнөх аялал тоглолтын үеэрээ тэр Loewe, Burberry, Versace брэндүүдийн хувцсаар гоёж байсан бол энэ удаа мөн л тус брэндүүдийн тусгайлан урласан хувцсаар гоёж байгаа ажээ. Мөн кантри урсгалыг өөрийн хэв маягтай холбосон хэд хэдэн дуунуудаа толилуулахдаа тэрээр ковбой хэв маягаар хувцаслах нь дамжиггүй байсан юм. Энэ ч утгаараа Бейонсе ковбой хэв маягийн төгс илэрхийлэл болох жийнсэн өмд, бүрх малгайгаар тоглолтоо чимжээ. Тэрээр энэ сарын 19-ний өдрөөс эхлүүлэн Парис хотод гурван удаагийн тоглолт хийх хуваарьтай байгаа бөгөөд хувцас загварын ертөнц түүнийг ямар хувцаслалтаар тайзнаа гарахыг хүлээхийн сацуу дуучны үнэнч шүтэн бишрэгч нар бас ковбой хувцаслалтын шинэ трендийг бий болгох биз ээ.

Ингээд Cowboy Carter аялан тоглолтын нүд хужирлам хувцаслалтуудтай танилцацгаая.