Милан хотод үзэгдсэн шилдэг street style төрхүүд
Олон давхар хувцас, өнгөлөг хээнүүдээр дүүрэн Миланы гудамж
Намар-өвөл 2022 улирлын эрэгтэй загварын долоо хоног Милан хотноо нэгдүгээр сарын 14-18 өдрүүдэд болж өнгөрлөө. Энэ удаад Zegna, Alyx, Dolce & Gabbana, Prada, Fendi зэрэг дэлхийн шилдэг брэндүүд шинэ улиралд зориулсан эрэгтэй цуглуулгаа толилуулсан юм. Миланы загварын долоо хоног дээр редакторууд, томоохон блогерууд гээд загварын салбарынхан төдийгүй хөлбөмбөгийн шигшээ багын гишүүд хүртэл цугларсан байлаа. Зочдын хувцаслалт дунд неон улбар шар, тод ягаан, цэнхэр, хүрэн улаан, beige, саарал, классик хар өнгөнүүд зонхилсон байна. Нүд эрээлжлэм олон төрлийн хээ, үслэг болон савхин материал, сул эсгүүртэй загварууд, бүтээлч хайчилбарууд, oversize пальтонууд тэдний төрхүүдэд давамгайлсан харагдлаа. Мөн олон давхар хувцаслалтыг бүтээлчээр загварчилж, зоримог гоёл чимэглэлийн шийдлүүдийг оруулж, бусад хотуудад үзэгдээгүй хэв маягийг бий болгосон байна. Харин гутлын сонголтын хувьд урт түрийтэй арьсан гутал, чөлөөт хэв маягийн кет, лофер зэргийг түлхүү өмсжээ. Ингээд Миланы загварын долоо хоног дээрх өнгөлөг, өвөрмөц шийдлүүдээр дүүрэн street style төрхүүдийг хүлээн авна уу.
