Трампыг дэмжигчид Капитолын ордон руу дайрч үймээн дэгдээснээр дөрвөн хүн амиа алджээ
Вашингтонд болсон эмх замбараагүй байдал олон нийтийг цочроогоод байна
Нэгдүгээр Сарын 6-ний өдөр буюу Лхагва гарагт АНУ-ын Вашингтон хотод байрлах Капитолын ордон руу Трампыг дэмжигчид дайралт хийж, үүний улмаас дөрвөн хүн амь насаа алдсан болохыг CNBC мэдээллэж байна.
Дайралт болох үед Капитолын ордонд Сенат болон Конгрессын хамтарсан хуралдаан болж, өнгөрсөн арваннэгдүгээр сарын 3-ний өдөр болсон Ерөнхийлөгчийн сонгуулийн үр дүнг эцэслэж, Ардчилсан Намаас нэр дэвшигч Жо Байдены ялалтыг баталгаажуулах санал хураалтыг явуулж эхэлж байсан юм. Уг хуралдаан эхлэхээс өмнө Дональд Трамп дэмжигчдэдээ хандан "бид хэзээ ч бууж өгөхгүй, хэзээ ч ялагдал хүлээхгүй" хэмээн мэдэгдэл хийсэн бөгөөд үүний дараа дэмжигчид нь чуулганы ажиллагааг тасалдуулж, сонгуулийн үр дүнг хүчээр өөрчлүүлэхээр Конгрессын ордонд дайран орсон байна.
Капитолын ордон дайралтад өртөж хуралдаан завсарласан хэдий ч, цагдаагийн хүчнийхэн галт зэвсэг, нулимс асгаруулагч хий ашиглан эсэргүүцлийг намжааж, конгрессын гишүүдийг ордноос нүүлгэн шилжүүлсэн төдийгүй Үндэсний Гвардын цэргүүд Конгрессын ордонд ирснээр жагсагчдыг хөөн гаргаж, дэг журам тогтоон хурлыг үргэлжлүүлж эхэлжээ.
Дайралтын үеэр нэг эмэгтэй буудуулсны улмаас амь үрэгдэж, өөр бас нэгэн эмэгтэй болон хоёр эрэгтэй одоогоор тодорхой бус шалтгаанаар таалал төгссөн байна.
Хотын цагдаагийн дарга Роберт Контигийн мэдээллэснээр цагдаагийн дотоод хэргийн хэлтэс дээрх буудуулсан эмэгтэйн хэргийг шалгаж байгаагаас гадна бусад гурван үхлийн шалтгааныг тогтоохоор ажиллаж байгаа гэнэ. Мөн Контигийн хэлснээр 14 орчим цагдаа гэмтэл авсан байна.
Вашингтон хотын дарга Мюриел Боузер нийт 15 хоногийн олон нийтийн онцгой байдлыг зарлажээ.
