Шилдэг номнуудын жагсаалт

Улс төр 

Dark Money - Жейн Майер

Америкийн сэтгүүлч Жейн Майерын бичсэн уг номонд Кохын ахан дүүс болон бусад баян гэр бүлүүд мөнгөний тусламжтайгаар Америкийн улс төрийг хэрхэн өөрсдийн ашиг сонирхолд эргүүлж байгааг өгүүлнэ. Жейн Майер нь эрэн сурвалжлах сэтгүүл зүйгээр дагнасан сэтгүүлч бөгөөд улс төрийн хуйвалдааны талаар түлхүү бичдэг юм.

Инээдмийн, хошин

Go The F**k To Sleep - Адам Мансбах

Энэхүү номыг Америкийн зохиолч Адам Мансбах бичсэн бөгөөд "Ядарсан эцэг эх нарт зориулсан хүүхдийн ном" гэж тэрээр тайлбарласан юм. Энэхүү номыг бичих санаа түүнд анх их хөгжилтэй байдлаар орж иржээ. Адамын хоёр настай охин унтахгүй хоёр цаг гаруй болоход ихэд ядарсан тэрээр "Унтаад өгөөч ээ" гэж бодохдоо яг ийм ном гаргахаар шийдсэн гэдэг.

Эрүүл мэнд

When Breath Becomes Air - Пол Каланити

Пол Каланитигийн бичсэн энэхүү ном нь 36 насандаа IV шатны уушигны хорт хавдартай гэж оношлогдсон эмчийн дурсамж юм. Пол Каланити нь арав гаруй жилийн туршлагатай мэдрэлийн мэс засалч байжээ. Тэр олон ч өдөр үхэж магадгүй хүмүүсийг эмчилсэн боловч нэг өдөр өөрөө үхэлтэй тэмцэж буй өвчтөн болон хувирсан ажээ.

Хоол, жин барих зөвлөгөө

Cravings - Крисси Тейген

Загвар өмсөгч, телевизийн од Крисси Тейген хоолны ном гаргасан гэхээр та гайхаж байна уу? Мэдээж энэ нь хоолны дэглэмийн ном огт биш. Түүний бас нэг сонирхол бол амттай хоол юм. Уг номонд олон янзын амттай хоолны жорноос гадна хэрэгтэй зөвлөгөө нэлээдгүй багтжээ. Жишээлбэл, түүний нөхөр дуучин Жон Лежендийн алдарт шарсан тахианы жор хүртэл орсон байна.

Загвар

Pretty Happy - Кейт Хадсон

Жүжигчин Кейт Хадсоноос "Та ямар дасгал хийдэг вэ?, Хэрхэн хооллодог вэ?, Яаж биеийн галбираа хадгалж үлддэг вэ" зэрэг асуултуудыг сэтгүүлчид байнга асуудаг аж. Харин энэ бүхний хариултуудыг тэрээр энэхүү номондоо тусгаж өгчээ. Мөн өөрийгөө хүлээн авч хэрхэн аз жаргалтай амьдрах талаар хэрэгтэй зүйлүүдийг багтаасан гэнэ.

Амьтад

H Is for Hawk - Хелен Макдональд

Их Британийн зохиолч Хелен Макдональдын бичсэн "H Is for Hawk" ном нь Samuel Johnson Prize шагналыг хүртсэн дурсамж ном юм. Номонд зохиолч бүсгүй Хелен аавыгаа алдаж, сэтгэлийн хямралд орж буй тухай гарна. Фото сэтгүүлч байсан аавыгаа тэр эргээд босгож чадахгүй ч өөрийгөө хямралаас гаргаж чадна гэдгээ ухаарч, тэр харцага сургахаар шийддэг байна.

Боловсрол

I Am Malala - Малала Юсуфзай

Дэлхийн хамгийн нөлөө бүхий хүмүүсийн тоонд зүй ёсоор багтдаг Малала охины намтар ном гарсан цагаасаа эхлэн сая, сая уншигчдыг байлдан дагуулж байгаа юм. Малала Юсуфзай нь 11 настай байхдаа BBC-д блог бичиж олонд танигдсан юм. Пакистаны хүний эрхийн төлөө тэмцэгч Малала охин Талибанчуудад буудуулж, хүнд гэмтэл авч байсан бөгөөд энэ тухайгаа мөн номондоо дурссан байдаг. 

Олны танил хүмүүс

Yes Please - Эми Полер

Америкийн инээдмийн жүжигчин, продюсер, найруулагч, зохиолч Эми Полерын бичсэн уг дурсамж номонд эцэг эхийн үүрэг, гаднах төрх болон биеийн хэлбэрээс үүдсэн хязгаарлалтууд зэрэг сонирхолтой сэдвүүдийг хөндсөн байна. Эми Полерын хэлснээр бол тэр өмнө нь дандаа ямар нэгэн дүрийн өмнөөс бичдэг байсан бол өөрийнхөө тухай бичих нь илүү амаргүй байсан гэнэ.

Бизнес

The Big Short - Майкл Льюис

Америкийн зохиолч, сэтгүүлч Майкл Льюисийн бичсэн энэхүү номонд 2000-аад оны Америкийн ипотекийн хямралыг урьдчилан таамагласан хүмүүс хэрхэн баяжсан талаар өгүүлнэ. Анх 2010 онд тус ном хэвлэгдэж, улмаар 2015 онд Холливүүдын кино болон дэлгэцэнд гарчээ. Харин киноны найруулагчаар Адам Маккэй ажиллаж, гол дүрийг Кристиан Бэйл бүтээсэн юм.

Уран зохиолын бус электрон номын төрөлд тэргүүлсэн зохиол

The Rainbow Comes And Goes - Андерсон Купер, Глория Вандербильт

Америкийн сэтгүүлч, зохиолч, CNN телевизийн хөтлөгч Андерсон Купер болон түүний ээж жүжигчин, зураач, зохиолч Глория Вандербильт нарын харилцааны тухай өгүүлсэн ном. Глория Вандербильт 92 насандаа хүнд өвчин туссанаар ээж хүү хоёрын харилцаа хэрхэн гүнзгийрч байгаа талаар гарна.

Цахим болон хэвлэгдмэл хувилбар нь хоёул өндөр борлогдсон ном

The Sleep Revolution - Арианна Хаффингтон

The Huffington Post дижитал сэтгүүлийн үүсгэн байгуулагч, зохиолч, сэтгүүлч Арианна Хаффингтоны бичсэн уг номноос та нойрны ач холбогдлын тухай бүхий л зүйлийг олж мэдэх болно. Түүний бичиж буйгаар бол бид нойргүйдлийн эрин үед амьдарч байгаа бөгөөд энэхүү номоос хэрхэн түүнээс ангижирч, амьдралаа өөрчлөх тухай унших боломжтой.

Гэр бүл

What To Expect When You're Expecting - Хайди Муркофф

Дэлхийн шилдэг борлуулалттай, эцэг эхчүүдэд зориулсан What to Expect цуврал номны зохиолч Хайди Муркоффын бичсэн энэхүү номонд жирэмсэн байх үед хэрэг болох бүхий л мэдээллүүд агуулагдаж байгаа. Энэхүү жирэмслэлтийн хөтөч ном нь анх 1984 онд хэвлэгдсэн бөгөөд гарсан цагаасаа New York Times-ын хамгийн борлуулалттай номны жагсаалтыг тэргүүлсээр байгаа юм. Түүнчлэн уг номон дээр тулгуурлаж Холливүүдын ижил нэртэй кино хүртэл хийгдэж байсан билээ.