Хиймэл оюун ухаанаас бүтсэн виртуал охидын хамтлаг дебютээ хийнэ
Бодит хүнгүй хамтлаг
Загварын салбарт виртуал загвар өмсөгчид аль хэдийнэ өөрсдийн байр суурийг эзлээд эхэлсэн бол дуу хөгжмийн салбарт ч мөн виртуал технологи ашиглагдаж эхэлжээ.
Тодруулбал Өмнөд Солонгосын хиймэл оюун ухаан хөгжүүлэгч Pulse9 компани Eternity хэмээх 11 гишүүдээс бүрдсэн виртуал хамтлаг байгуулж буйгаа зарласан байна. Өмнө нь мөн SM энтертэйнмент aespa хэмээх амьд дуучид болон виртуал дуучдаас бүрдсэн хамтлагийг танилцуулсан юм. Харин Eternity хамтлагийн хувьд бүхий л зүйл нь AI, тэр дундаа Deepfake технологийн тусламжтайгаар бий болж буйгаараа онцлогтой гэнэ.
Eternity хамтлагийн гишүүдийг шалгаруулахдаа интернет орчинд санал асуулга явуулан хамгийн их санал авсан 11 моделийг сонгосон ба гишүүд тус бүр өөрсдийн өвөрмөц зан төрхтэй юм. Түүнчлэн Pulse9 компанийн зүгээс Eternity хамтлаг бодит үйл ажиллагаанд оролцох боломжгүй, харин сурталчилгааны нүүр царай, инфлюенсерээр ажиллах боломжтой хэмээн мэдэгджээ.
Eternity хамтлаг гуравдугаар сарын 26-нд анхны уран бүтээлээ цацах ба тизер бичлэгээ Youtube тавцандаа байршуулсан байна.
