Diesel брэнд жийнсэн хувцасны чиг хандлагыг харууллаа

Diesel брэнд Миланы загварын долоо хоногийн хүрээнд намар-өвөл 2023 шинэ цуглуулгаа танилцууллаа. Тус брэнд нь деним хувцсыг уламжлалт уйтгартай байдлаар биш, харин футуристик, streetwear, Y2K хэв маяг тусган бүтээлчээр урладаг билээ. 

Тэд загварын шоуныхаа интерьер дизайныг нүсэр декор, уулга алдуулам чимэглэлээр дүүрэн зохион байгуулсаар ирсэн. Тэгвэл Diesel энэ удаа ч мөн дотоод заслаараа олны анхаарал татсан нь танхимын төв хэсэгт байрлах Durex-н бэлгэвчнүүдээр босгосон өндөр овоохой юм. Durex компани загварын салбарт анх удаагаа хөл тавихдаа ийнхүү Diesel брэндтэй хамтарсан байна. Тэд энэхүү хамтралынхаа хүрээнд 300,000 ширхэг бэлгэвч Diesel-ийн салбар дэлгүүрээр үнэгүй тараахаар болжээ.

Бүтээлч захирал Гленн Мартены урласан цуглуулгын хувьд зарим хэсгээрээ нэвт гэрэлтэх жийнсэн өмд, болор шигтгээтэй бариу даашинз, мото стилийн хүрэм, гандсан мэт цайралттай цамц болон бусад загваруудаас бүрдэж байна. Мэдээж хэрэг брэндийн нэрийн хуудас болсон өнөө цагийн It цүнхнүүдийн нэг 1DR загварын шинэ хувилбар ч мөн цуглуулгад багтжээ.