Хувцаслалтад нас хамаагүй - 56 настай загварын блогер Грис Ганем

Өмнө нь микробиологич мэргэжлээр ажиллаж байгаад одоо загварын блогер хийдэг болсон 56 настай Грис Ганем өөрийн Instagram хуудаснаа хагас сая гаруй дагагчтай. Винтэж Celine өмсөх дуртай тэрээр 50 гарсан эмэгтэйчүүд заавал уйтгартай кардиган өмсөх албагүй гэдгийг харуулдаг бөгөөд ямар ч насандаа хүссэнээрээ чөлөөтэй, загварлаг хувцаслаж болдог гэдгийн тод жишээ билээ.

Грисийн хэлснээр түүний одоогийн стиль залуугийнх нь стилиэс бараг л ялгагддаггүй гэнэ. "Би үргэлж л энгийн эсгүүртэй атлаа тод өнгө, хээтэй хувцаснуудад дурладаг байсан" хэмээн тэрээр Их Британийн Vogue сэтгүүлд ярьсан юм. Мөн яг одоо түүний шүүгээнд Bottega Veneta брэндийн минимал хувцаснууд, Saks Potts-ийн лакан арьсан ягаан пальто зэрэг загварууд голчилж байгааг тэрээр дурджээ.

Грис Ливан улсад төрж өссөн хэдий ч иргэний дайны улмаас төрөлх нутгаа орхих шаардлагатай болсон аж. Одоо тэрээр Канадын Монреальд амьдардаг бөгөөд хувийн дасгалжуулагч хийдэг байна. Мөн Грис өөрийгөө инфлюэнсер гэж огтхон ч боддоггүй ба охиныхоо ятгалгаар л Instagram хуудас нээжээ. "Бүх юм хобби маягаар л эхэлсэн. Бид хоёр хамт аялах бүртээ зургаа даруулж хийдэг байсан юм" хэмээн Грис дурссан юм.

Эцэст нь тэрээр бүх насны эмэгтэйчүүдэд хандан ийм нэгэн зөвлөгөө өгчээ. "Өөр дээрээ анхаарлаа төвлөрүүлж, бусдын бодол санаанд бүү автаарай. Хувцас таныг илүү үзэсгэлэнтэй, хүчтэй, баяр баясгалантай мэдрүүлэх учиртай юм".