Австралийн загварын долоо хоногийн гудамжаар: Street style төрхүүд

Австралийн Afterpay загварын долоо хоног яг одоо Сидней хотод өрнөж байна.  Жил бүр зохион байгуулагддаг энэхүү арга хэмжээн дээр Австралийн болон олон улсын дизайнерууд өөрсдийн Resort буюу аяллын цуглуулгаа танилцуулдаг уламжлалтай билээ. Одоогийн байдлаар Anna Quan, Maggie Marilyn, Wynn Hamlyn зэрэг дотоодын 40 орчим брэнд шинэ бүтээлүүдээ олон улсаас хүрэлцэн ирсэн загварын редактор, худалдан авагчдын өмнө толилуулаад байна. 

Afterpay-ын тайзнаа харагдсан тэгш бус хэмтэй тейлор хийцтэй мини даашинз, лайм ногоон өнгө, oversize силуэттэй хантааз, усны урсгал мэт хунирсан макси даашинз, нэвт гэрэлтэх материал гэсэн чиг хандлагууд энэ жилийн арга хэмжээний ерөнхий уур амьсгалыг тодорхойлжээ. Харин загварын шоуг үзэхээр Carriageworks соёлын төв дээр хүрэлцэн ирсэн зочдын хувьд хавар-зун 2023 улиралд өргөмжлөгдсөн томоохон трендүүдийн нэг деним төрхийг төрөл бүрийн стильд хувирган хэрэгжүүлсэн харагдлаа. Мөн яг одоо Австралийн намрын улирал дуусч өвлийн жавар орж эхэлсэн тул хүмүүсийн дийлэнх нь савхин хүрэм, парка цув, ноосон цамц зэргийг түлхүү загварчилжээ.