#FreeBritney: Бритни Спирс эцгийнхээ хараа хяналтаас чөлөөлөгдөхийг хүсэж байна
Тэрээр өөрийн хүслийн эсрэг эцгийнхээ хяналт дор байдаг билээ
АНУ-ын дуучин Бритни Спирс эцгийнхээ хууль ёсны асран хамгаалалтаас татгалзаж, энэхүү шийдвэрийг цуцлах шаардлагыг шүүхэд хүргүүлжээ. Харин өнгөрсөн Лхагва гарагт буюу зургаадугаар сарын 23-нд тухайн хэргийг хэлэлцэх цахим шүүх хурал болж өнгөрсөн хэмээн Dazed сэтгүүл мэдээллэж байна.
“Өмнө нь би шүүгчтэй харьцахдаа өөрийгөө хоосон орон зай мэт мэдэрсэн. Би яг л үхсэн хүн шиг намайг тоож авахгүй байсан. Бүгд намайг худал ярьж байна гэж бодож байгаа мэт би мэдэрсэн. Би худал хэлээгүй ээ, магадгүй одоо энэ нөхцөл байдлыг өөрчлөх хэрэгтэй гэдгийг шүүгч та ойлгож байгаа байх. Би хүнтэй гэрлэж, хүүхэдтэй болохыг маш ихээр хүсэж байна. Надад гэрлэх зөвшөөрөл өгөхгүй байгаа. Би спиральтай бөгөөд үүнийг эмч дээр очиж авахуулахыг хүсэж байгаа ч мөн л асран хамгаалагч нар маань зөвшөөрөхгүй байна. Энэ асран хамгаалалт надад сайнаар нөлөөлөхөөс илүү их хор хөнөөл учруулж байна. Би амьдрах эрхтэй” хэмээн дуучин бүсгүй шүүх хурлын явцад хэлжээ.
Мөн тэрээр өөрт нь хүчээр химийн элемент болох лититэй эм бэлдмэл өгч байсан гэж хэлсэн байна. Энэхүү элементийг агуулсан бэлдмэлүүд нь сэтгэцийн хоёр туйлт өвчнийг эмчлэхэд ашигладаг билээ. “Үүнээс болж би согтуу байгаа юм шиг мэдэрдэг байсан. Би зүгээр л ухаан орж чадахгүй байсан. Надад ээж, аавтайгаа тайван ярилцах боломж ч байсангүй. Би тэдэнд айж байгаагаа хэлэхэд зүгээр л над дээр зургаан сувилагч авчирч миний биеийг шалгуулсан юм” хэмээн Бритни хуваалцсан байна.
Эргэн сануулахад, түүний эцэг Жейми Спирс 2008 онд охиныхоо асран хамгаалагчаар томилогдсон юм. Түүнээс хойш аав нь дуучны өмч хөрөнгө, санхүү, ажил мэргэжил, хувийн амьдрал зэрэг асуудлуудыг хянах болсон билээ.
2020 онд Бритни Спирс асран хамгаалах эрхийг эсэргүүцэхийг оролдсон боловч шүүх хуралдаанд ялагдсан юм. Үүний дараа тэрээр аав нь түүний асран хамгаалагч байхаа больсон үед л тайзан дээр эргэж ирнэ гэдгээ мэдэгдэн тайлан тоглолтуудаас татгалзсан байна.
Асран хамгаалалт гэдэг нь хууль ёсны хяналтын нэг хэлбэр юм. Тухайн хүн бие даан өөрийгөө халамжлах чадваргүй болоход хамаатан садан эсвэл дотнын хүн нь өв залгамжлах эрхийг шүүхээр дамжуулан авч асран хамгаалах хүнийхээ өмнөөс бүх шийдвэрийг гаргадаг байна. Ихэнхдээ ахмад настан, хөгжлийн бэрхшээлтэй хүмүүс эсвэл хүнд өвчтэй хүмүүс ийм халамжид хамрагддаг билээ.
