Dior, дизайнер Кьюрид "Баярлалаа" гэж хэллээ

Мария Грация Кьюри Dior-ын эмэгтэй хувцас хариуцсан бүтээлч захирлын албан тушаалаас бууж буйгаа албан ёсоор зарлалаа. Тэрээр Dior загварын ордны түүхэнд анхны эмэгтэй бүтээлч захирал болсноосоо хойш өөрийн бүтээлүүдээрээ загварын ертөнцөд феминист үзэл санааг хүчтэй дамжуулж, илэрхийлж чадсан юм. Үүний хамгийн том жишээ нь 2017 оны цуглуулгад багтсан "We Should All Be Feminists" гэсэн уриатай футболк байлаа. Тэрхүү цагаас хойш Кьюри эмэгтэй хүний гоо зүй хийгээд феминизмийг зогсолтгүй уриалсаар ирсэн. Түүгээр ч зогсохгүй тэрээр салбар дундын мэргэжилтнүүдийн олон талт бүтээлч хамтын ажиллагаанд үргэлж нээлттэй ханддаг байсныг онцлох нь зүйтэй.

Тэрээр улс орон болгоны уламжлалт гар урлаач, уран бүтээлч нартай хамтран ажиллаж олон гайхалтай цуглуулгыг танилцуулахдаа дан ганц Европ гэлтгүй Азийн орны урлаач нартай ч хамтарснаар Dior-ийн нэрийг улам өндөрт гаргаж чадсан. Жишээлбэл, Кьюри Энэтхэгийн Мумбай хотын эмэгтэй гар урчуудтай хамтран ажиллаж тус орны уламжлалт хувцасны соёлыг Dior-ийн баримталдаг үндсэн хэв маягтай хоршуулж, 2023 онд бүтэн цуглуулга туурвиж танилцуулж байв.

Түүнчлэн түүний бүтээлч удирдлагын дор Dior санхүүгийн хувьд үлэмж өсөлттэй байсан гэдгийг дурдах нь зүйтэй болов уу. Тодруулбал, 2016 онд тус брэндийн хувцас борлуулалт 2.2 тэрбум евро байсан бол 2023 онд 9.5 тэрбум еврод хүрсэн нь Dior-ын түүхэн дэх дээд амжилтуудын нэг болсон. Үүний цаана Кьюригийн бүтээлч сэтгэлгээ байсан гэхэд хэн ч үл маргах биз ээ. Брэндийн гүйцэтгэх захирал Делфин Арно "Кьюригийн феминист үзэл хийгээд онцгой бүтээлч сэтгэлгээ Dior брэндийн борлуулалтын өсөлтөд асар их хувь нэмэр оруулсан" гэж тэмдэглэжээ. Мөн Кьюригийн сүүлийн цуглуулга болох 2026 оны чиг хандлагыг тодорхойлсон cruise шоу Ром хотод хэдхэн хоногийн өмнө танилцуулагдсан нь нэг талаараа түүний төрөлх нутаг дахь сэтгэл хөдлөм үдэлтийн арга хэмжээ болж өндөрлөжээ. 

Цаг хугацаа өнгөрөх тусам загварын түүхэнд түүний нэр зөвхөн нэг дизайнер эмэгтэй бус харин бүсгүйчүүдийн дуу хоолой болон феминизмийг өөрийн уран бүтээлүүдээрээ илэрхийлж чаддаг уран бүтээлч, загварын бэлгэ тэмдэг гэдгээрээ танигдан үлдэх нь гарцаагүй. Түүний хамгийн том гэрч нь Dior гэх аугаа брэнд өөрөө юм.