Үнэртний сурталчилгааны гол дүр хэн бэ: Брэндүүдийн томоохон шийдвэрүүдийн цаадах учир

Хюберт ван Живанши “Загварлаг хувцсыг харахад таашаалтай, харин сүрчиг нь нүдэнд үл харагдах хамгийн хүчтэй гоёл” гэж хэлсэн байдаг. Ганц энэ тодорхойлолт бус өөр олон алдартай хүмүүс үнэртэй усыг өөр өөрсдийнхөөрөө тайлбарладаг. Үндсэндээ танаас ямар үнэр ханхална, тэрхүү үнэр таны хэн болохыг тодорхойлдог билээ.

Хувцас загварт Коко Шанель өөрийн нэрийн үнэртнийг гаргасан тэр цагаас хойш олон олон дизайнерууд өөрсдийн сүрчгийг бүтээсээр байна. Өдгөө дэлхий даяар зарагдаж буй мянга мянган сүрчгүүд дунд таныг илтгэх үнэртэн байж л байгаа гэдгийг санагтун. Ийм баялаг үнэртний ертөнцөд бид амьдарч байгаа нь гайхалтай ч гагцхүү энэ л таны хайж буй үнэртэй ус гэдгийг давуу байдлаар сурталчилдаг нь хувцас загварын орднууд билээ. Таны мэлмийд харин янз бүрийн сурталчилгаа хоногшсон байж мэднэ. Тэр дундаа алдартай хувцас загварын орднууд өөрсдийн сүрчгийн дүрс бичлэг, сурталчилгаагаа бараг л богино хэмжээний кино маягаар хийдэг нь бүр ч бишрэм.

Брэндүүд өөрсдийн сурталчилгаанд ямар хүн тоглуулах вэ гэдэг шийдвэрийг 50 гаруй хүний бүрэлдэхүүнтэй урлагийн зөвлөлтэйгөө ярилцаж баталдаг ба энэ бүх хугацаанд дэлхийн ямар ч брэнд тохироогүй хүн тоглуулсан удаа байхгүй гэж хэлж болно. Гэвч сүүлийн жилүүдэд хэрэглэгчид хайртай үнэртэй усных нь сурталчилгаанд өөр алдартнууд тоглох болсныг хэт цочир хүлээн авах болжээ. Бүтэн 20 жил зөвхөн тэр сүрчгийг олон янзаар сурталчилсан Холливүүдийн одод ч бий. Нөгөөтээгүүр үнэртэй усыг тэдэнгүйгээр төсөөлөх нь бас бэрх болсон мэт.

Жүжигчин Шарлиз Тероны дараа дуучин Рианна J'adore, Dior

2004 онд Жон Галлиано Dior брэндийн урлаг хариуцсан захирлын албан тушаалд ажиллаж байх үедээ жүжигчин Шарлиз Теронд санал тавьснаар J'adore сүрчгийн сурталчилгааны домог болсон хэд хэдэн зар сурталчилгаа гарчээ. Түүний халааг 20 жилийн дараа дуучин Рианна авснаар J'adore дахин үнэ цэнээ өөрчилсөн гэж хэлж болно. Харин зарим хүмүүс “Миний Шарлиз Терон хаана байна” гэсэн сэтгэгдэл үлдээсээр л байна.

Модель Дэвид Гандигийн дараа жүжигчинТео Жеймс Light Blue, Dolce & Gabbana

Эрэгтэй хувцас загварын салбарт үнэмлэхүй амжилт гаргаж чадсан эрэгтэй загвар өмсөгч бол Дэвид Ганди билээ. Тэрээр бараг л бүх эрэгтэй хувцасны брэндүүдтэй хамтарч ажилласан гэж дүгнэж болох ба тэр дундаа Dolce & Gabbana брэндийн Light Blue үнэртэй усны сурталчилгаанд 2007 оноос хойш ажиллаж эхэлжээ. Тэгвэл энэ жил тус сүрчгийн шинэхэн сурталчилгаанд америкийн жүжигчин Тео Жеймс тоглолоо.

Жүжигчин Кейт Бланшеттийн дараа залуу од Сэди Синк Si, Giorgio Armani

Оскарийн шагналт жүжигчин Кейт энэ жил UNIQLO брэндийн нүүр царай болж буйгаа зарласан. Өмнө тэрээр Giorgio Armani-гийн Si хэмээх үнэртний сурталчилгаанд тоглож байсан бол түүний залгамж халааг залуу жүжигчин Сэди Синк авчээ. Giorgio Armani Si ертөнцөд залуу үеийн эрч хүч, шинэлэг мэдрэмжийг авчрахад Сэди тохирох байж мэдэх юм.

Францын эрэгтэй жүжигчин Гаспар Ульелийн дараа Тимоти Шаламе Bleu de Chanel

Сонирхуулахад францын жүжигчин Гаспар Ульель өөрийнхөө жүжиглэх авьяасыг Saint Laurent киногоороо гайхалтай харуулж чадсан. Тэрээр Chanel брэндийн эрэгтэйчүүдэд зориулан гаргадаг сүрчиг болох Bleu de Chanel-ийн нүүр царайгаар олон жил ажилласан бөгөөд үүний дараачаар Холливүүдийн од Тимоти Шаламе тус брэндийн сурталчилгаанд тоглож эхэлжээ.