MTV VMA 2023: Улаан хивсний шилдэг төрхүүд

MTV хөгжмийн сувгаас жил бүр зохион байгуулдаг Video Music Awards шагнал гардуулах ёслол Нью-Жерси мужийн Ньюарк хот дахь Prudential Center-т албан ёсоор эхэллээ. Арга хэмжээнд оролцож буй алдартнууд жил бүр этгээд, содон, сонирхолтой төрхүүдийг бүрдүүлэн үзэгчдэд хувцаслалтаараа хүлээлт үүсгэдэг. Дуучин Мадоннагийн 1984 онд өмссөн хуримын цагаан даашинз, Lil' Kim-ийн 1999 онд гоёж байсан нил ягаан хослол, Lady Gaga-гийн 2010 онд шуугиан тарьсан махаар хийгдсэн даашинз зэрэг нь мартагдашгүй загварын мөчүүдийг бүтээж байсан түүхтэй. Энэ жил ч гэсэн мөн адил нүд хужирлам, шийдэмгий, содон загваруудыг бидэнд бэлджээ.

Жишээ нь дуучин Doja Cat өөрийн шинэхэн цомогтоо зориулан аалзны тор мэт хувцаслаж, сормуусаа аалзны хөл шиг будаж ирсэн бол Селена Гомес болон Тейлор Свифт нар харц булаам тачаангуй даашинзаар гоёжээ. Ники Минажийн Барбиг санагдуулам ягаан өнгөтэй сүйт бүсгүйн хослол, Жаред Летогийн цус сорогч мэт тас хар хувцаслалт болон нүүр будалт, Оливия Родригогийн 150'000 ширхэг Swarovski шигтгээтэй мөнгөлөг даашинз зэрэг нь анхаарлын төвд ороод байна. Мөн BTS-ийн "дүү" хамтлаг гэгддэг TXT анх удаа тус арга хэмжээнд оролцож байгаа ба тэд oversize хослолоор жигдэрч олны харцыг булаажээ.