Эмма Уотсон, Тимоти Шаламе нарын тоглосон "Little Women" киноны албан ёсны зургууд цацагдлаа
Луиза Мэй Олкоттын сонгодог романаас сэдэвлэсэн кино
Vanity Fair сэтгүүл тун удахгүй дэлгэцнээ гарах "Little Women" буюу "Жаалхан авхай нар" киноны албан ёсны зургуудыг нийтэлжээ. Киноны найруулагчаар Оскарын таван номинаци, Алтан Бөмбөрцөг наадмын гурван удаагийн шагналт "Lady Bird" киноны найруулагч Грета Гервиг ажиллахаар болсон байна.
Зохиолч Луиза Мэй Олкоттын бичсэн "Жаалхан авхай нар" роман нь АНУ-ын иргэний дайны үед амьдарч буй Марчийн гэр бүлийн дөрвөн эгч дүүсийн түүх юм.
Тус зохиолоос сэдэвлэн бүтээгдсэн хамгийн алдартай дэлгэцийн бүтээл нь 1994 оны "Little Women" кино юм. Энэхүү хувилбарт жүжигчин Вайнона Райдер, Кирстен Данст, Клэр Дэйнс, Кристиан Бэйл нар тоглодог бөгөөд тухайн үед тус бүтээл Оскарын шагналын гурван төрөлд нэр дэвшиж байжээ. Харин Грета Гэрвигийн хувилбарт Эмма Уотсон, Сирша Ронан, Мерил Стрип, Лора Дерн, Тимоти Шаламе, Луи Гаррель зэрэг жүжигчид тоглосон юм. Энэхүү кино нь 2019 оны арванхоёрдугаар сарын 25-нд нээлтээ хийнэ.
