Грэмми 2024: Улаан хивсний шилдэг төрхүүд
Хөгжмийн ертөнцийн хамгийн нэр хүндтэй шагнал гардуулах ёслол болох Грэмми наадам 66 дахь удаагаа Лос-Анжелес хотын Crypto.com цэнгэлдэх хүрээлэнд ёслол төгөлдөр зохион байгуулагдаж өндөрлөлөө. Наадмын гол шагналын эздээр Билли Айлиш, Майли Сайрус, Тайлор Свифт, Killer Mike, Виктория Моне, Paramore нар тодорсноос гадна дуучин Тейлор Свифт Грэмми наадмын түүхэнд "оны шилдэг цомог" шагналыг дөрвөн удаа хүртсэн анхны хүн болсон амжилтыг үзүүллээ. Энэ жилийн наадмыг Тревор Ноа хөтлөн явуулж, тайзнаа Дуа Липа, Майли Сайрус, Брэнди Кларк, Билли Айлиш болон бусад уран бүтээлчид үзүүлбэрээ толилуулсан юм.
Грэмми наадмын хамгийн сонирхолтой мөчүүдийн нэг бол шагнал гардуулах мөч эхлэхээс өмнөх улаан хивсний ёслол байдаг. Энэ жилийн улаан хивсний ёслолд Грэммигийн түүхэнд нэрээ мөнхөлж чадсан дуучин Тейлор Свифт Schiaparelli брэндийн кутюр даашинзыг дизайнер Лоррейн Шварцын 300 каратын алмаазан хүзүүний зүүлттэй хослуулан эрхэмсэг төрхийг бүтээжээ. Харин дуучин Майли Сайрус ихэнх зочдын бүрдүүлсэн сонгодог төрхийг эвдэж дизайнер Жон Гальяногийн урласан Maison Margiela брэндийн 14,000 ширхэг алтан сүлбээр зүүнээс бүрдсэн даашинз сонгосон нь олны анхаарлыг татсан юм.
