Хайх

“Бид бүгд эрх тэгш гэдгийг сануулж байна”. Коронавирус бидэнд юу сургаж байгааг Билл Гейтс тайлбарлалаа

“Бид бүгд эрх тэгш гэдгийг сануулж байна”. Коронавирус бидэнд юу сургаж байгааг Билл Гейтс тайлбарлалаа

Мэргэн үгс

Text: Бюро 24/7


Америкийн бизнесмен Билл Гейтс коронавирусын цар тахал бидэнд юу сургаж байгаа талаар хувийн үзэл бодлоо хуваалцсан нээлттэй захидал бичжээ. Түүний бодлоор бид аливаа үйл явдлыг муу эсвэл сайн гэж дүгнэж харахаас үл хамааран тэрхүү үйл явдлын ард оюун санаа болон сэтгэл зүрхний мөн чанарт нөлөөлөх тодорхой шалтгаан байдаг аж.

Нийт 14 зүйлээс бүрдсэн Билл Гейтсийн захидлаас бид хамгийн чухал санаануудыг тоймлон хүргэж байна.

Бид бүгд эрх тэгш гэдгийг сануулж байна. Бид соёл, шашин, мэргэжил, санхүүгийн байдал, алдар нэрээс ул хамааран бүгд эрх тэгш. Энэ өвчний хувьд бид бүгд эн тэнцүү. Магадгүй бид ч бие биедээ ингэж хандах ёстой байх. Хэрвээ надад итгэхгүй байгаа бол Том Хэнксээс асуугаарай.

Бид бүгд хоорондоо холбоотой болохыг сануулж байна. Нэг хүнд нөлөөлсөн зүйл бусдад ч мөн нөлөөлдөг. Бидний босгосон хуурмаг хил хязгаарууд үнэндээ чухал ач холбогдолгүй гэдгийг харуулж байна. Учир нь вируст паспортын хэрэг байхгүй. Мөн энэ вирус биднийг богино хугацаанд дарангуйлахдаа насаараа дарангуйлалд амьдарч байгаа бусдыгаа ойлгоход хүргэж байна.

Бидний эрүүл мэнд хичнээн чухал болохыг сануулж байна. Бид тэжээл муутай, чанаргүй хоол хүнс хэрэглэж, химийн бодисоор бохирдсон ус ууж, эрүүл мэндээ хичнээн их үл ойшоодог болохыг ойлгуулж байна. Хэрвээ бид өөрсдөө эрүүл мэнддээ анхаарахгүй бол мэдээж хэрэг бид өвдөж л таарна.

Амьдрал богино гэдгийг сануулж байна. Ганц олдох амьдралдаа бид үнэн хэрэгтээ юу чухал болохыг ойлгох хэрэгтэй. Харин хамгийн чухал нь бие биедээ, тэр дундаа өтөлж, өвдсөн нэгэндээ тусалж, дэмжих явдал юм. Бидний амьдралын зорилго ариун цэврийн цаас худалдаж авахад оршоогүй.

Бидний нийгэм хичнээн материалистик болсныг сануулж байна. Гэтэл хүнд, хэцүү үед бидэнд тансаглал биш харин ердөө л хоол, ус, эм хэрэгтэй гэдгийг бид ойлгож байна.

Бидний хувьд гэр бүл болон гэрийн амьдрал хичнээн чухал болохыг сануулж байна. Вирус биднийг гэртээ байхыг албадаж, жинхэнэ гэрийн дулаан уур амьсгал бий болгож, гэр бүлийнхээ харилцааг бэхжүүлэхэд хүргэж байна.

Бидэнд тайван байх эсвэл айдаст автах гэсэн хоёр сонголт байдгийг сануулж байна. Хүн төрөлхтний түүхэнд ийм нөхцөл байдал өмнө нь нэг биш удаа бүрдэж байсан тул бид үүнийг ойлгон тайван байх учиртай. Аль эсвэл үүнийг дэлхийн төгсгөл мэт хүлээн аван айдаст автаж, өөрсдөдөө болон бусдадаа бүр ч илүү хор хөнөөл учруулж болох юм. Сонголтыг бид өөрсдөө л хийнэ.

Дэлхий өвдсөн байгааг сануулж байна. Бид дэлгүүрийн тавиурууд дээрх ариун цэврийн цаас хэр хурдацтай дуусаж байгааг анзаарч буйн адил ой мод устгалын түвшинг ч сайтар хянах ёстой. Бидний гэр өвдсөн болохоор л бид өвдөж байна.

Аливаа бэрхшээлийн дараа үргэлж амар амгалан ирдгийг сануулж байна. Амьдрал мөчлөгөөр үргэлжилдэг. Энэ бол нэгэн том мөчлөгийн ердөө нэг үе шат нь. Бидэнд айж, сандрах шаардлага байхгүй. Энэ ч бас өнгөрөх болно.

Ихэнх хүмүүс корона/COVID-19 вирусыг том гамшиг гэж харж байгаа боловч би үүнийг "агуу залруулагч" гэж харж байна.

"Энэ нь бидний мартсан байсан чухал сургамжуудыг сануулахаар бидэн дээр ирсэн. Гагцхүү тэдгээр сургамжуудыг ойлгох эсэх нь биднээс шалтгаална" хэмээн Билл Гейтс захидлаа өндөрлөжээ.

Гейтсийн нээлттэй захидлын бүтэн хувилбарыг Наоми Кэмпбелл өөрийн Instagram хуудаснаа нийтэлсэн байгаа.

 

 

 

Төстэй нийтлэлүүд

Buro 24/7-гийн сонголт

Сэтгэгдэл бичих

цааш үзэх