Хилари Суонк ба Филип Шнайдер: Сая долларын бүсгүй хуримаа хийлээ
Аз жаргал хүсье!
"Оскар", "Алтан Бөмбөрцөг" шагналуудын эзэн, жүжигчин Хилари Суонк бизнес эрхлэгч Филип Шнайдертай хуримаа хийлээ. Хиларигийн хэлж буйгаар тэд анх сохор болзоогоор танилцаж, харилцаагаа эхлүүлсэн бөгөөд жил хагасын дараа сүй тавьж, дахиад хоёр жилийн дараа ийнхүү хуримаа хийжээ.
Хосуудын хурим хэвлэл мэдээлэл, олны нүдээс далд, нууцаар зохион байгуулагдсан байгаа. Хиларигийн эцэг саяхан уушгины хагалгаа хийсний улмаас онгоцоор нисэх хориотой байсан тул ёслолын байршлыг сүйт бүсгүй төрөлх гэртэйгээ ойр Санта Лючия ой модонд сонгожээ. Тэрээр хуримлах ёслолын үеэр Elie Saab брэндийн 150 цагийн турш гараар оёсон даашинз өмсөж, Christian Louboutin-ы гоёмсог өндөр өсгийттэй хослуулсан юм.
Харин ёслолын дараах үдэшлэг дээр Хилари нөхрийн хамтаар товшлуур бүжиг хийсэн бөгөөд ингэхдээ тэрээр Dior-ын бүтээлч захирал Мария Грация Кьюригийн урласан даашинз ба хүрмээр гоёсон байлаа.
Төгсгөлд нь шинэхэн хосууд Burning Man стилийн унадаг дугуй хөлөглөн аз жаргалаар дүүрэн бал сараа тэмдэглэхээр явсан юм.
