Грэммигийн эргэн тойронд: Silk Sonic шилдгээр тодорч, В.Зеленский үг хэллээ

2022 оны хөгжмийн ертөнцийн шилдгүүд тодорлоо

Хэдхэн хормын өмнө Лас Вегас хотын MGM Grand Garden Arena цэнгэлдэх хүрээлэнд хөгжмийн ертөнцийн шилдгүүдийг тодруулдаг 64 дэх удаагийн Грэмми шагнал гардуулах ёслол амжилттай зохион байгуулагдаж өндөрлөлөө. Энэ жилийн Грэмми ёслолоос Бруно Марс, Anderson .Paak нарын үүсгэн байгуулсан Silk Sonic хэмээх R&B дуо хамтлаг "Шилдэг дуу бичлэг", "Шилдэг дуу", "Шилдэг R&B үзүүлбэр", "Шилдэг R&B дуу" зэрэг нийт дөрвөн шагналын эзнээр тодорсон юм. Мөн 2021 онд дебютээ хийсэн Оливия Родриго "Шилдэг шинэ уран бүтээлч", "Шилдэг поп соло үзүүлбэр", "Шилдэг поп цомог" шагналуудыг хүртэж, маш том амжилт байгууллаа.

Хэрэв өнгөрсөн жил 63 дах удаагийн Грэмми шагнал гардуулах ёслол ямар ч үзэгчгүй цомхон өрнөсөн бол энэ удаагийн арга хэмжээ үзэгчидтэй хэвийн горимоор өрнөж, уран бүтээлчид ч мөн мартагдашгүй үзүүлбэрүүд үзүүлж, бид бүгдийг доргиож чадлаа. Энэ үдэш BTS хамтлаг хит болсон “Butter” дуугаа тайзнаа толилуулж, Жастин Бибер "Peaches" дуугаа дуулж, Lil Nas X “Montero (Call Me by Your Name)” болон “Industry Baby” бүтээлүүдээ толилуулан мартагдашгүй үдшийг бэлэглэсэн юм.

Грэммигийн эргэн тойронд: Silk Sonic шилдгээр тодорч, В.Зеленский үг хэллээ (фото 1)

Үдшийн өөр нэгэн онцлох мөчийг дурдвал, ёслолын үеэр Украины ерөнхийлөгч В.Зеленский бичлэгээр дамжуулан Америкийн дуу бичлэгийн академи болон олон нийтэд хандаж үг хэлсэн байна. Тэрээр яг одоо Украинд өрнөж буй аймшигт явдлуудыг дурдаж, уран бүтээлчдээс өөрсдийн дуу хөгжмийн тусламжтайгаар Украины ард иргэдийг дэмжин дайны эсрэг зогсохыг хүссэн байна. “Дайны талаар үнэнийг хэл. Өөрсдийн цахим сүлжээнд, мөн телевизийн сувгуудаар. Биднийг чадах бүхнээрээ дэмжээрэй. Ямар ч аргаар хамаагүй. Чимээгүй л байж болохгүй” хэмээжээ. В.Зеленскийг үгээ хэлж дуусахад дуучин John Legend Украины ард иргэдэд дэмжлэгээ илэрхийлж "Free" хэмээх шинэ дуугаа Украины гурван уран бүтээлчийн хамтаар толилуулсан юм. Түүнтэй хамт тайзнаа дуучин Мика Ньютон дуулж, Сюзанна Иглидан Украины уламжлалт бандура хөгжмийн зэмсэг дээр тоглож, харин яруу найрагч Люба Якимчук үзүүлбэрийн төгсгөлд Украины ард иргэдийн төлөө залбирсан билээ.