2019 оны шилдэг архитектурын зургуудыг хүргэж байна
Энэ жилийн хамгийн гайхалтай архитектурын зургууд дунд Данийн Camp Adventure Observation цамхаг, Норвегийн мушгирсан музейн үзэсгэлэнт зураг, Шеньжен хотын тэнгэр шүргэх нүсэр өндөр барилгын зураг зэрэг бүтээлүүд багтжээ.
Жил бүр зохиогддог энэхүү архитектурын гэрэл зургийн тэмцээнд эдгээр зурагчдаас гадна 21 өөр оролцогч нэгдсэн бөгөөд ялагчид нь арванхоёрдугаар сард Амстердам хотод болох Дэлхийн архитектурын наадам дээр (WAF) зарлагдах юм. Нийт оролцогчдын гуравны нэг нь Их Британи улсын иргэд боловч эцсийн шатанд тунаж үлдсэн оролцогчид дунд БНХАУ, АНУ, Румын, Колумб зэрэг хол нутгийн оролцогчид ч байгаа.
Гэрэл зургуудыг гадна засал, дотор засал, гар утсаар дарсан зураг зэрэг нийт зургаан ангиллаар шалгаруулж ялагчдыг тодруулах болно. Үүнээс дөрвөн ангиллын ялагчдыг арванхоёрдугаар сард зохиогдох наадмын үеэр санал хураалтаар тодруулах юм. Харин тэмцээний гол ялагчийг нэр хүндтэй архитекторууд болон салбарын мэргэжилтнүүдээс бүрдсэн шүүгчдийн бүрэлдэхүүн сонгон шалгаруулах болно. Өнгөрсөн жилийн топ шагналыг Шанхай хотын Баруун Бунд дахь Long музейн гайхалтай дүр төрхийг буулгасан зурагчин Павел Паничко хүртэж байжээ.